30.12.10

قلب صقر

 صقر طاير ف السما بيسابق الريح
لا يهمه حد ولا مستنى تصريح
يا ترى يا صقر مبسوط من دنيتك
ولا قلبك كده زى قلبى جريح

طموح مجروح

 طموح مجروح جوايا كله آمال
ذنبه الوحيد أتجرأ وشطح بالخيال
احتار عقلى بين ميت سؤال
كله كلام قلنا وقال
دوام الحال م المحال
...والمحال حلم سايق ف الدلال
وجدتها.. اية رأيكوا نرجع من تانى عيال؟؟

27.12.10

متلزمنيش


حلمى زى طير ألم وملهش ريش
قلبى عوده منحنى مبيترويش
قلمى انهزم قدام حاجات مبتتحكيش
قدام رواية بنبتديها مبنتهيش
عندى سؤال
والسؤال ؟؟
السؤال مليان ردود
وكل الناس عليا شهود
الغصن لو مات واندفن
يقدر على طرح الورود؟؟
ازاى أكون؟؟
ومطرحى مبيسعنيش
صوتى ممنوع مش مسموع
حاجات جوايا تتصارع وانا الموجوع
وبعد ده كله مستنيانى
أعود تانى .. لا متستنيش
ما دمتى انتى رفضانى متلزمنيش

طيف بعثرنى


مرت الحياة هادئة على غير العادة
فهل هذا هو الهدوء الذى يسبق العاصفة؟؟
وفجأة .. بدون سابق انذار .. 
اخترقها طيف .. بعثر سكونها .. 
شتت ركودها .. أعترتنى حالة غضب عارمة ..
زلزلت كيانى و وجدانى .. 
ضجرت منه ونفرت ولكن سرعان ما آلفته واعتدت عليه ..
حاولت أن أتصدى للرياح لكنها تعصف بكل ذى قوة ..
حاولت ان أعاند أقاوم أصرخ لكن دون جدوى ..
لقد أصبح صوتى مبحوحا وقلبى مجروحا .. 
لحظة صمت .. أسمع فيها صوت يأتى من أعماقى .. 
يحاوررنى ويسألنى .. 
  لماذا تصر والكل رافض .. خاضع .. مستسلم ؟؟
.. جاوبته والالم والحسرة يعتصران قلبى .. أحلم بأيام مشرقة و حياة سعيدة 
..  أأمل أن أتحرر من قيود الفكر المشتت ..  تعبت ولا أعرف الى اين تنتهى رحلتى 
.. الى بر أمان وسلام .. أم الى مزيد من الحيرة وصمت الكلام .. ؟؟


قولى الفولة يا عم خليل


 ياما شفنا على الارض عجايب
من آدم و قابيل التايب
حكام فراعين .. لصوص سلاطين
و شعوب من طين
مماليك و عساكر حرامية
و حلنجى و قالوا عليه نايب
و الناس أهى ماشية و شقيانة
تقع و تقوم .. تفرح و تزوم
و ساعات يقولوا ف الليل مواويل
ما هى دنيا بترقص بالزمامير
ما تقولى الفولة يا عم خليل
رد عليا بكل قيامة
يا عزيزى الارض بتجمعنا
وصبحنا على الهم نسايب
متخافش الليل لا هيفضل ليل
و لا نور الشمس هيفضل غايب

26.12.10

بسمات فى زكريات



فى صمت الليل وهبوب النسمات
وفى سكون الوحدة تقتل الساعات
هاجمتنى الحروف متوهجة بالكلمات
ألح عليه قلمى بالارتجافات
قال لى لا تكتبى الدمعات
...وتعالى نتذكر أجمل اللحظات
عندما قلت لى أحبك بكل اللغات
أشتعلت بقلبى همسات
أذابتنى بجمرها وتناثرت كالنجمات
لملمتنى ابتسامتك وترقرق لدى دمعات
مادمت انت معى مهما بعدتنا مسافات

رؤية ربانية


مشيت على البحر وبصيت فوقيا
لقيت الشمس طالعة .. شعاع منور ..
نازل بالطول على وش المية
شديت كرسى ومديت رجليا ف قلب المية بحنية
فجأة!!
ظهرت حاجة خطفت قلبى وعقلى وعنيا
...رايحة وجاية .. شوية شوية قربت عليا
سألت نفسى يا ترى اية هى؟!!
أتاريها رؤية ربانية
باسم حبيبى اللى فى يوم هيبقى ليا

زكريات من عمر فات


كان ياما كان
مواطن فقير غلبان
قادر يعيش بالعافية
ماشى ف طريقه هلكان
عيشته جابتله الكافية
يبص وراه يلاقى حكايات
ماضى مليان بالزكريات
رجالة ولاد بلد جدعان
وف وقت الشدة الأصل يبان
أسرة ف بيت دفيان
خضرة وطبيعة
ولا أجدعها ريشة لفنان
وقول للزمان ارجع يا زمان
ساق الطناش ولا كأنه سمعان
فجأة حس بفوقان
قال احنا ولاد النهاردة
احنا ولاد بكرة
بأدينا هتتعدل وتبقى عال

الحكاية


موالى موال وحكايتي حكاية
تعالوا واسمعوا منى الرواية
قصتي بسيطة لكن حويطة
مفيهاش هجوم ولا فيها لوم
شوية هيصة على زمبليطة
...لاجل ما نلبس فى اقرب حيطة
خلص الكلام .. وكده كفايــــة

قطرة مطر



قطرة مطر طايرة كده وهاوية
عمالة ترقص فى الهوا محمية
فجأة..اتصدمت بقوة فى الصخرة
فرحتنى وهى فى الاخر منهية

الفجر شقشق



الفجر شقشق
عصفور يزقزق
فلاح بيعزق
كارمه ربه
وهب له ارضه
...حاميله عرضه
وسط عياله
قاعد مروق
لا شاغل باله
مين يسكت
ومين يزعق

التار



عدى النهار والكل مل الانتظار
طقوا وهاجوا وقالو لازم ناخد بالتار
لقينا روحنا بناخد تارنا من بعضنا
وهنعمل اية مكنش قدامنا اختيار

وعد مكتوب


 وعد و كان على الجبين مكتوب
ومهما قلت اتوب ادوب انا فيه دوب
العيب ده مش فيا و لما ابص حواليا
الاقى دنيا ماشية بالشقلوب

اللى فات .. مات


اللى فات مات وراح وانقضى
ليه تنبشوا فى الزكريات
وف اللى مضى
احنا ولاد النهاردة احنا ولاد بكرة
نفسنا نحس بأمان وفرح ورضا

ع المكشوف


خلاص يا خلق اللعب بقى ع المكشوف
وادينا عايشين وبكرة ياما نشوف
نصيحة منى شيل ده من ده يرتاح ده عن ده
الدنيا تتظبط وترجع تانى للمألوف